Como cada ano o universo de deica! crece con unha nova colección de ilustraciós de Iria Ribadomar. Xa podedes atopalas formando parte de tódolos tipos de pezas da nosa Tenda Online.
Lanzamento da colección 2016
Etiqueta: deica!
Colección 2015 – Toxo, Carballeira e Lique
A natureza forma parte dun xeito especial da nosa identidade, ten unha influencia profunda en nos e na nosa filosofía e por iso ten o seu lugar en deica! A natureza galega ten unha capacidade infinita de xerar emocións, de modular o noso estado de ánimo, de condicionar a nosa vida… Fragas, vales, ríos, montes, praias e illas son tesouros dos que desfrutamos pero polos que tamén sufrimos (lumes, petroleiros, industrias contaminantes…) porque os sentimos coma unha prolongación do noso propio corpo.
Nestes primeiros “deicas” da “familia da natureza” pensamos en tres iconas da nosa xeografía:
O Toxo e as súas flores enchen Galicia de cor case todo o ano. Fermosa e delicada a vez que resistente e agresiva, pranta salvaxe que se adapta a todo, que renace das situacións máis difíciles e que durante séculos foi un recurso amplamente aproveitado para a vida diaria do campo.
Un paseo pola Carballeira é unha mostra de escultura expresionista, unha revolta de formas debuxadas no ceo que cambian co día e co mes do ano. A carballeira é moito máis que un conxunto de arbores, é un ecosistema equilibrado e sostible, un fogar. É un escenario ideal para as festas e as romarías, un escenario para a vida.
O Lique é un termómetro do estado de saúde da natureza e Galicia esta chea deles, dende os máis delicados ata os máis resistentes. É un ingrediente inseparable da nosa arquitectura, sexa na pedra, na madeira, no formigón, no ladrillo ou na uralita, en pouco tempo os liques entran en acción para policromar e mimetizar as construccións coa paisaxe.
Colección 2015 – Sachadeira e Tamborileira
A música non pode faltar en cada nova colección de deica! A nosa banda sonora vai gañando en matices con cada incorporación.
A Tamborileira bate o tambor e acompaña nas foliadas o son da gaita cos seus redobres.
A Sachadeira traenos o son das celebracións vencelladas ós traballos colectivos do campo. Toca o sacho acompañando as coplas entre faena e faena. É tamén o guiño que dende deica! Lle facemos a celebración da Aña Urbana en Pontevedra, que cada ano marca o noso aniversario.
Colección 2015 – Labrega e Mariscadora
Galicia é un país de mulleres loitadoras cun marcado sentido da dignidade. Traballan día a día no mar e na terra superando, moitas veces soas, os obstáculos dun mundo que non está pensado para elas. A bata-mandil é para nos un símbolo da súa identidade. Nais, fillas e aboas que son transmisoras dos saberes dunha cultura milenaria. Non sentan en consellos de dirección nin manexan negocios millonarios e moitas veces son invisibles, máis nos as temos por imprescindibles.
Moitas traballan cunha das riquezas máis importantes que temos, os recursos naturais, coidando do seu equilibrio e esforzándose para mantelo. A Mariscadora no mar e a Labrega na terra, co capacho na cabeza e o fouciño na man son as dúas ilustracións coas que quixemos homenaxealas na colección 2015 de deica!.
Colección 2015 – Rosalía
Na colección 2015 de deica! Quixemos facerlle unha homenaxe a nosa admirada artista. Rosalía merecía un retrato que fixera xustiza á muller vital, intelixente, valente e loitadora que percibimos nas súas obras.
Sempre se nos presenta a Rosalía como unha muller melancólica, chea de morriña e de saudade, que sufriu a discriminación de ser á vez muller e galega. Pero nos non atopamos nin rastro de victimismo nin da melancolía que intencionadamente se lle atribúe e si moito de forte personalidade e profunda sensibilidade, de vigor e rebeldía, de entusiasmo por unha terra, por unha natureza, por unha forma de vivir… Moito de retranca e de ironía, moito de denuncia explícita das inxustizas. Ela mestura con naturalidade a tradición e a vangarda nas súas obras e o seu pensamento segue hoxe a ser adiantado. Rosalía é un espello no que mirarse como galegas, e recoñecerse diversas e fermosas, fortes, intelixentes, alegres e loitadoras.
Por iso, e lonxe das iconografías frías e masculinizadas, que a presentan máis coma icona inmóbil de pedra, queríamos retratar a unha Rosalía viva coa que poder seguir a dialogar hoxe arredor das luces e sombras do pensamento, arredor do xénero, da identidade, da cultura, da política, da vida…
Lanzamento nova colección 2015
deica! Crece con cada nova colección. Temos o pracer de presentar as novas ilustracións que nos acompañarán a partir de agora, sumándose as anteriores e formando parte da familia de deica!
Nas seguintes entradas falaremos máis sobre cada unha. Desta vez están deseñadas a partir de varias temáticas:
-As mulleres loitadoras e traballadoras, como son a nosa querida Rosalía e a tódalas mulleres que saen adiante no día a día como Labrega e Mariscadora.
-A música, que non podía faltar na nova colección de deica! para amliar a nosa banda sonora con novas incorporacións como Sachadeira e Tamborileira.
-E a natureza, algo central na nosa identidade, con unha influencia transcendental no noso carácter e na nosa filosofía. Con Toxo, Carballeira e lique teremos o pracer de levala sempre con nos.